Útilokað er að skila útflutningstekjum í kardimomubæ Ponzílands

Hvernig geta útflytjendur tekið mark á vælinu í Geir H. Haarde um að skila útflutningstekjum heim í banka á barmi gjaldþrots? Til banka á kennitöluflakki óreiðumanna og sem búið er að ræna úr og rupla slíkum fjárhæðum að nú riða nýju kennitölurnar til falls.

Hvaða útflytjandi vill taka peninga frá sínum viðskiptavinum og senda niður slíkt fjársvikaræsi? Þess fyrir utan er það nánast útilokað að nokkrir erlendir viðskiptavinir fáist til að senda peninga til skríls sem samlíkt er með Ponzi fjársvikamyllum.

Hvaða stjórnandi erlends fyrirtækis vill senda peninga til spillingarríkis þar sem valdasjúk ríkisstjórn heldur þjóðfélaginu í heljargreipum með ónýtum seðlabanka og gjaldþrota bankastofnunum sem rúnar eru öllu trausti. Hvernig gæti stjórnandi í erlendu atvinnulífi réttlætt slík afglöp fyrir viðskiptavinum og hluthöfum ef peningarnir tapast og hann fær ekki vörur sína eða þjónustu?

Þegar bankahrunið var að gerast varaði ég stjórnarþingmann við því að nákvæmlega þetta myndi gerast yrðu bankarnir ríkisvæddir með þeim formálum sem nú hefur verið gert. Ég fullyrti að Íslenskt fjármálalíf yrði þá í augum heimsins eins og illkynja krabbamein með þeim afleiðingum að við færum aftur á hausinn. Ekkert var hlustað á mín varnarorð.

Ég var svo hræddur um þetta að þegar ég gat ekki fengið nein svör við tilboði mínu þrátt fyrir að hringja daglega í tvær vikur og biðja um umboð til að bjóða hingað til lands þeim erlendu sérfræðingum sem gátu hjálpað að endurreisa bankana af einhverju viti, keypti ég heilsíðu auglýsingu í Fréttablaðinu. Þar bauðst ég opinberlega til að sækja þessa fjármálaspekinga heim. Ekki einu sinni heilsíðu auglýsing virkaði á stjórnarliðið enda virðist rigna inn um nefið á þeim. Nú stefnum við aftur á hausinn nákvæmlega eins og ég spáði fyrir um.

Geir H. Haarde og hans hjörð þurfa að átta sig á því að þeir geta aðeins siglt þjóðarskútunni í strand. Þeir geta aðeins stefnt niðurávið. Þeir hafa klúðrað málum svo rækilega bæði í aðdraganda bankahruns og nú aftur á undanförnum fjórum mánuðum að bloggarar og fjölmiðlar leita að týndum milljarðatugum á meðan bankaræningjarnir ganga hér lausir. Hverslag vitleysisrugl er í gangi?

Hvers vegna sækir ekki Ríkislögreglustjórinn Ólaf Ólafsson og Ólaf Ragnar Grímsson og yfirheyrir þessa menn? Er bankaránið ekki nægjanlega stórt fyrir lögregluna? Liggja strengirnir ekki nægjanlega hátt uppí stjórnkerfið? Er löggi orðinn of feitur og latur til að vinna sína vinnu?

Ekki stóð á að sækja mig um miðja nótt og stinga í svartholið við Hverfisgötu innan 3ja klukkustunda þegar mér dirfðist að mótmæla stuðningi landráðamannanna í Stjórnarráðinu við snarbrjálað og blóðugt Írakstríð morðingjans Bush. Þá kom löggi hlaupandi eins og húsbóndahollur hundur. 

Komið hefur fram í fréttum í dag að Óla Ólsen bandið, umfangsmesti bankaræningi landsins ásamt sjálfum forseta kardimomubæjar hjálpuðust við að hala inn þýfið frá Katar. Það sendir enginn heilvita maður peninga langt út í ballarhaf uppá einangraða eyju sem stjórnað er af valdasjúkri klíku og glæpagengi. Er erfitt að skilja það Geir H. Haarde?

Ef hér eiga að komast á eðlilegir viðskiptahættir þarf að byrja á því að moka út úr Alþingishúsinu. Ég skora á stjórnarandstöðuna að ganga út, allir sem einn maður, við setningu þingsins á þriðjudag. Þá munu stjórnvöld ekki eiga annars kosta völ en segja af sér. Annað yrði staðfesting til heimsbyggðarinnar á ráðherraræðinu hér og myndi afhjúpa einræðistilburðina sem lögðu grundvöllin að stærstu fjársvikamyllu heimsins og landið fengi líklegast viðurnefnið Ponzíland.

Athugasemdir

[Offari, 15.1.2009 kl. 21:34]

Nú finnst mér þú vera að eyða orku þinni í má sem skiptir máli. Ég er sammála þér að hæpið sé að leggja pening í banka sem enginn treystir. Traustlaus banki er gagnslaus.

[Jónas Jónasson, 15.1.2009 kl. 23:26]

jæja er 2000 kallinn kominn í gang? flott grein, ég hef líka alltaf haft þá tilfinningu frá því að bankakerfið hrundi fyrst að allt muni hrynja alveg niður oní ræsi og því fyrr því betra.

Maður ætti að fara að huga að hrossakaupum. ÍÍha! 

[Karl Birgir Þórðarson, 16.1.2009 kl. 13:15]

stofnaðu nyan stjornmalaflokkog gerðu skurk i spillingunni.

[Eva Ó. (IP-tala skráð) 16.1.2009 kl. 13:21]

Nú hefur þú lög að mæla ;-)