"Þorpsfíflið" Gunnar Smári Egilsson

Gunnar Smári Egilsson fer mikinn í viðtali við Morgunblaðið í dag, og veltir því upp hvernig persóna Íslenska þjóðin sé, tragísk persóna eða trúður? Gangster eða saklaust fórnarlamb?

Gunnar segist vera að gera "heimildarmynd" um ástandið ásamt slúðurberanum sjálfum Mikael Torfasyni. Þetta er nú meiri bræðingurinn. Og þeir segjast ætla að sýna þessa "heimild" í útlöndum?

Í leiðara Fréttablaðsins kallaði Gunnar Smári mig "þorpsfífl" í kjölfar þess að ég benti á þann nakta sannleika, með beinum yfirlýsingum svo og táknrænum mótmælum, að "efnahagsundrið" sem Gunnar Smári var sokkin í á bólakaf, svo og framganga fjölmiðla í því sambandi og misnotkun stjórnvalda á dómskerfinu væri í ætt við "Nýju fötin keisarans" og verið að hafa alla þjóðina að fíflum.

Hinn höfundur "heimildarmyndarinnar" er ritstjórinn sem "ritstýrði" þeirri ótrúlega frumlegu lygasögu inn á forsíðu DV sorpritsins, að ég hefði sent "Átta vopnaða hrotta á leigendur". Hamagangurinn var svo mikill að koma lygasögunni í loftið að þeir höfðu ekki einu sinni fyrir því að slá á stutt símtal til kanna sannleiksgildið áður en DV forsíðunni var dreift í allar verslanir Bónus í uppstækkaðri mynd, og auglýst í hinum 365 miðlunum, sjónvarpi, útvarpi og Fréttablaðinu!

Nú ætla þessar blaðurskjóðar að kynna sögu Íslands erlendis á hvíta tjaldinu. Minntist einhver á trúverðugleika?